صدر ڊاڪٽر عارف علوي پاران باباءِ قوم جي 147 هين پيدائش جي ڏهاڙي جي موقعي تي پاڪستاني عوام کي دلي مبارڪون

اسلام آباد – 25 – ڊسمبر (اي پي پي) صدر ڊاڪٽر عارف علوي باباءِ قوم جي 147 هين پيدائش جي ڏهاڙي جي موقعي تي پاڪستاني عوام کي دلي مبارڪباد ڏيندي چيو آهي ته اسان جو تصور هڪ اهڙو پاڪستان آهي جيڪو اميد، عزم ۽ انصاف جي روشني طور بيٺل هجي، هڪ اهڙي قوم جيڪا هڪ جمهوري، انصاف پسند ۽ آزاد معاشري جي واعدي تي قائم هجي. اچو هن ڏينهن وچن ڪريون ته اسان اسلامي نظرين، اخلاقي قدرن، اتحاد ۽ ڀائيچاري جي فروغ جي لاءِ ڪم ڪنداسين. موجوده حالتن جي گهرج آهي ته باباءِ قوم جي ويزن ۽ ان جي رهنما اصولن تي عمل پيرا ٿي اتحاد ۽ جمهوري قدرن جي فروغ سان گڏوگڏ ملڪ کي درپيش چئلينجز تي ضابطو آڻي سگهجي. پنهنجي پيغام ۾ صدر ڊاڪٽر عارف علوي چيو ته قائداعظم محمد علي جناح قوم جو اهو عظيم محسن هو جنهن جي اڻٿڪ محنت سان ننڍي کنڊ جي مسلمانن جي لاءِ هڪ جدا وطن قائم ٿيو. آل انڊيا مسلم ليگ جي اڳواڻ طور هن برطانوي هندستان ۾ مسلمانن جي حقن ۽ مفادن جي وڪالت ڪئي. قائداعظم مسلمانن جي لاءِ هڪ جدا وطن جي نظريي تي پڪو يقين رکندو هو، جتي اهي آزاداڻي طور تي پنهنجي مذهب تي عمل ڪري سگهن ۽ انهن کي سياسي نمائندگي حاصل هجي. پنهنجي عظيم تقريرن ۽ اڻٿڪ محنت جي ذريعي جناح هڪ جدا قوم جي مطالبي جي حمايت کي ڪاميابي سان متحرڪ ڪيو. هن چيو ته هي ڏينهن اسان کي قائداعظم جي نظرين ۽ ويزن کي اختيار ڪرڻ ۽ پاڪستان کي هڪ خوشحال ۽ مضبوط ملڪ بڻائڻ جي لاءِ پنهنجون ڪوششون جاري رکڻ جي ياد ڏياري ٿو. اڄ اسان باباءِ قوم جي لچڪ، دانشمندي، بصيرت ۽ دورانديشي کي خراج عقيدت پيش ڪريون ٿا جنهن هڪ اهڙي قوم جو بنياد رکيو جنهن کي ايمان جي قوت متحد ڪري ٿي. مون کي اهو چوندي فخر محسوس ٿئي ٿو ته پاڪستاني عوام گذريل ڪيترن ئي ڏهاڪن دوران ڪيترن ئي چئلينجز کي منهن ڏيندي وڏي حوصلي جو مظاهرو ڪيو آهي. اها ڳالهه وڌيڪ اطمينان جوڳي آهي ته پاڪستان چئلينجز جي باوجود مختلف شعبن ۾ نمايان ڪاميابيون حاصل ڪيون آهن. هن چيو ته اڄ جڏهن اسان سندس ياد ملهائي رهيا آهيون ته اهو ضروري آهي ته اسان هيستائين جيڪو شاندار سفر ڪيو آهي ان تي غور ڪيو وڃي. صدر ڊاڪٽر عارف علوي چيو ته ڏهاڪا گذري چڪا آهن هر هڪ باب آزمائش، فتح ۽ اسان جي ماڻهن جي اڻٿڪ جذبي جو عڪاس آهي. باباءِ قوم جي ويزن، سندس قيادت ۽ مدبراڻي انداز هڪ جمهوري ۽ جامع پاڪستان جو بنياد رکيو جتي سمورن مذهبن ۽ پس منظر جا ماڻهو گڏ رهي سگهندا هئا.

مضمون کا ماخذ : جنگل وائلڈ

متعلقہ مضامین